Ini tulisan dari blog tetangga kami orang Betawi asli yang sangat produktif, blognya ada di http://wiskul.wordpress.com en disadur berdasarkan ijin beliau nech. Kurang lebihnya seperti ini:
Bang Wiskul lagi keingetan ame dodol betawi, entu tuh, kuliner nyang waktu bang wiskul kecil jadi penganan nyang muncul cuman pade event tertentu doang. Misalnye waktu lebaran, ato kalo ade nyang nyunatin, dan laen”. Kebetulan ingetan ini muncul abis Bang Wiskul maen” ke kawasan Depok. Untung ajeh orang Betawi nyang dipinggiran Jakarta, tepatnye di Depok masih kagak lupa ame doi punya adat istiadat nyang udeh dilakonin turun temurun. Tradisi entu dibidang kuliner nyang dimane” sebenernye juga ada, yaitu dodol betawi, nyang salah satunye biase disiapin nyambut Hari Raye Idul Fitri a.k.a. Lebaran.
Sampe sekarang sech tradisi entu masih dilakonin warga Betawi asli di kawasan Cimanggis, Depok, Jawa Barat. Salah satunye nyang masih menjage tradisi ini Ibu Hajjah Suhaya. Dalem proses ngebikin dodolnye bu hajjah nech dibantu kerabat” warga asli betawi laennye.
Keterampilan Bu Suhaya bikin dodol diwarisin turun temurun tadi. Bikin dodol betawi emang rada ribet, bukan ape”, selaen campurannye banyak en reseh gitu, juga proses ngebikinnye kudu konsisten diaduk” nyang lama. Buju buneng dah!! Pas mulai buat dodol entu, paling kagak perlu tenage 8 orang nyang bertugas nyiapin en bikin adonan.
Dodol Betawi terbuat dari beras ketan, gula putih en gula merah juga ame santen kelape. Ngukus entu campuran bumbu ajeh pake dikukus 2 kali. Emang proses bikin Dodol perlu banyak waktu en tenage. Tapi sebenernye kebersamaan entu nyang jadi ciri khas pembikinan dodol tradisional Betawi. Misalnye, urusan menumbuk en ngayak beras ketan. Sambil nunggu ayakan beras, sebagian kerabat 
manasin gula merah pake kuali gede nyang disebut ‘kuali waja’. Semua dibikin dalem satu ruangan atawa dalem satu rumahan.
Lanjutannye, proses ngadukin pake sendok kayu en plastik. Kalo masih encer mah, biasenye pengadukan oleh para kerabat nyang perempuan. Kalo udeh mulai mengental en kerase berat pas diaduk, giliran kerabat laki” nyang giliran tugas. 
“Ampir 8 jam lebih diaduk terus. Kagak boleh berhenti, entar bisa ada gosongnye,” salah seorang dari kerabat ngebilangin. Bergiliran dah, tiap orang nyang ngaduk” ngumpulin itu tenage buat ngebolak-balik adonan. Bahkan, kadang” entu adonan dipukul” atawa kayak dibanting pake sendok gedenye entu supaya matengnye bersatu padu serumpun bambu… hwalah lebay…..
“Apinye kagak boleh terlalu gede nyalanye. Apelagi kalo udeh mo mateng gini ya, 
dikecilin ajeh ,” kate kerabat nyang laen. Jadi, semangkin kentel entu adonan, mangkenye semangkin dikecilin api kayu bakarnye. Salah satu keunikan Bu Suhaya ini, doi make kayu bakarnye dari pohon rambutan. Alesannye supaya asapnye kagak mengganggu aroma entu adonan dodol. Pan batang kayu rambutan kalo dibakar, asapnye kagak terlalu sangit gitu. Hmmmm, bener juga nech Bu Hajjah!
Kalo udeh 9 jam diaduk”, dodol udah mateng deh. Ciri-ciri dodol udeh mateng, kalo adonan udeh mulai agak lengket en kenyal. Dodol-dodol entu trus ditaroh di baskom” kecil. Dibagi jadi bagian” kecil, dodol dipotong”. Selesai dipotong, sebagian dodol dibungkus ame daun pisang nyang disebut dengan cara ‘dibentel’. Dodol nyang udeh jadi ini bisa tahan sampe 7-8 bulan. Wooouuuw……! “Kurang bagus kalo ditaro di kulkas. Nyang lebih bagus diangin-anginin ajeh,” kata personil dodol ditempat entu.
Dodol Betawi sampe sekarang masih banyak dicari warga Jakarta kalo lagi berkunjung ke rumah keluarge atawa kerabat saat bersilaturahmi. Ada nyang rela jauh” dari pinggiran Jakarta dikawasan laen, ngedatengin Bu Suhaya cuman pengen ngedapetin bikinan si Bu Hajjah di Depok entu.
Tapi emang ada kekuatiran, anak cucu kita nantinya, kagak berminat lagi nerusin 
tradisi ngebuat dodol. Kekuatiran entu muncul, mengingat sebagian orang a.k.a. anak muda lebih tertarik ngebeli kue kemasan kaleng buatan pabrik, sebab dianggep lebih praktis.
Quo Vadis Dodol Betawi!
Putri7 
Tinggalkan komentar